ಹ್ಹೋ || ಭೂಮಿಪುತ್ರೆ ಬಲಿಯೇಂದ್ರೆ ರಾಜ್ಯ ಮಾಡೊಡು ವರ್ಸೊಗು ಮೂಜಿ ಉಚ್ಚಯ, ಕಾಲೊಗು ಆಜಿ ಪರ್ವ, ಕಾಲಾದಿಗೊಂಜಿ ಓಮ, ಓಮೊಗೊಂಜಿ ನೇಮ, ನೇಮೊಡು ದಾನ, ದಾನೊಡ್ದೆಚ್ಚ ಧರ್ಮ, ಕತ್ತಲೆಗಯ್ಯಸಾರ, ಬಯ್ಯಗಯ್ಯಸಾರ ಬಂಗಾರ್ದಿರೆಟ್ ಬೆರಣ ಭೋಜನ ಮಲ್ಪಾವೊಂದು, ಅರತ್ತಾನ ಆಲಿಯೊಂದು ಇತ್ತೆನಾ ಭೂಮಿ ಪುತ್ರೆ ಬಲಿಯೇಂದ್ರೆ||
ಇಂಚ ಬಲಿಯೇಂದ್ರನ ಅರಸಾದಿಗೆನ್ ಪುಗರ್ ವೆರ್ ನಂದೊಳ್ಗೆ ಅಮುಣಂಜೆ ಗುತ್ತು ಶೀನಪ್ಪ ಹೆಗ್ಡೆ, ತಾನ್ ಸಂಪೊಲ್ತಿನ ತುಳುವಾಲ ಬಲಿಯೇಂದ್ರೆ ಸಂದಿಡ್.
ವಾ ಅರಸು ಸತ್ಯ ಧರ್ಮೊಡು ರಾಜ್ಯ ಆಲಿಯೊಂದುಪ್ಪುವೆನಾ ಆ ರಾಜ್ಯೊಡು ಕಾಲೊಗು ಸರಿಯಾದ್ ಬರ್ಸ, ಬರ್ಸೋಡ್ದು ಬುಲೆಭಾಗ್ಯ, ಬುಲೆಭಾಗ್ಯ ಉರ್ಕರ್ದ್ ಪೊಲಿಎಚ್ಚಿಯಾದ್, ಸಂತಾನ ಸಂತೇಸಿ ನಿಲೆಯಾದ್ ಜನಮಾನಿ ಸಂತೋಸುಡು ಉಪ್ಪೆವೆರ್.
ಅಂಚಾದೇ ಹಿರಿಯೆರ್ ಪಂಡೆರ್ ಅರಸು 'ಕಾಲದ' ಎಡ್ಡೆ ನಡಕೆಗ್ ಕಾರಣ ಆಪೆ.'ಕಾಲ' ನಡತೊಂದು ಬರ್ಪಿ ಸಾದಿಗ್ ಸತ್ಯಧರ್ಮದ ಪೂ ಬಿರ್ಕ್ ದ್ ಎದುಕೊನ್ನ ಅರಸುಗು ಕಾಲೊನು ನಿರ್ದರಿಪುನ ಎಡ್ಡೆ್ದಿಗೆ ಉಂಡೂಂದು ನಂಬೊಂದು ಬತ್ತಿನ ಸತ್ಯದ ಸಂಸಾರ ನಮ. ಅಂಚಿನ ಒರಿ ಅರಸು ನಮ ಭೂಮಿನ್ ಆಲ್ಯೊಂದು ಇತ್ತೆ. ಆಯೆನೆ 'ಬಲಿಯೇಂದ್ರೆ.
"ಪೊಲಿ ಪೊಲ್ಸಾವೊಡು". ಕಟಿ ಇಲ್ಲ್ ಬುಡಂದೆ ಪೊಲ್ಸು ದಿಂಜೊಡು. ಇಂಚಿನ ಬಯಕೆಡ್ 'ಭೂಮಿಪುತ್ರೆ ಬಲಿಯೇಂದ್ರೆ' ಪಂಡ್ ದೆ ಪುದಾರಾಯಿನ ಅರಸು ಬಲಿಯೇಂದ್ರೆ ಮಣ್ಣ್ ದ ಮಗೆನೇ ಆಯೆ.
"ಮಣ್ಣ್ ಡ್ ಪೊಂರ್ಬಿನಾಯೆ ನುಪ್ಪು ತಿನುವೆ, ನರಮಾನಿಡ ಪೊಂರ್ಬಿನಾಯೆ ಮಣ್ಣ್ ತಿನುವೆ". 'ಮಣ್ಣ್ ದ ಸತ್ಯ'. ಮಣ್ಣ್ ಪತ್ ದ್ ಸತ್ಯ ಮಲ್ತೆರ್. 'ನೆಲಕಾಯಿ ದರ್ತೆರ್', 'ಭೂಮಿದ ಆಜೆ' ಇಂಚಿನ ಹಿರಿಯೆರ್ನ ಅನುಭವದ ಪಾತೆರೊಗು ತರೆತಗ್ಗಾದ್ ಮಣ್ಣ್ ನ್ ನಂಬಿಯೇ ಅಂಚಾದ್ "ಬುಲೆ ಭಾಗ್ಯ" ದಿಂಜ್ಂಡ್. ಒರ್ಮೆಲಾ "ಪೊಲಿ" ತಮೆಲೊಂದು ಬತ್ತ್ಂಡ್.
ದಿಪೋಲಿ ಬತ್ತ್ಂಡ್
ಬುಲೆಭಾಗ್ಯ ಜಾಲ್ ಗ್ ಬತ್ತ್ ದ್, ಇಲ್ಲದ ಚಾವಡಿಡ್ ರಾಸಿ ಬೂರ್ದ್ ಅತ್ತಡ ತುಪ್ಪೆಡ್ ಪೊದಿಕೆಯಾಪುನ ಪೊರ್ತುಡು ದೀಪೊಲಿ ತುಳುವೆರ್ನ "ಪರ್ಬ" ಬರ್ಪುಂಡು. ಅದಗನೆ ತಾನ್ ಆಲ್ಯೊಂದಿತ್ತಿನ ತನ್ನ ರಾಜ್ಯೊನು ತೂಯರೆ ಬರ್ಪೆ ಒಂಜಿಕಾಲದ ನಮ್ಮ ಅರಸು ಬಲಿಯೇಂದ್ರೆ. ಆಯೆ ಬತ್ತ್ ಪೋಯಿಬೊಕ್ಕ ಪತ್ತನಾಜೆ ಮು‌ಟ‌್ಟ ಒಲ್ಪ ತೂಂಡಲಾ ನೇಮಾಯನತ ಗೌಜಿ. ಪೊರ್ತು ಕಂತ್ತ್ ದ್ ಪುಲ್ಯದ ಪೊರ್ತು ಮೂಡಿನೆಟ್ಟ ದೈವ ದೇವೆರ್ ನಮ ಸೀಮೆಗ್ ಜತ್ತ್ ದ್ ಬರ್ಪೆರ್, ಅಬ್ಬರೊಡು ಅಬಯ ಕೊರ್ಪೆರ್. ಬುಲೆ ಸಲೆ ಕಾಪುವೆರ್, ಜೋಕುಲು ಬಾಲೆಲೆಗ್ ಕೈಕಾರ್ ಗ್ ಸುಕ ಕೊರ್ಪೆರ್, ನಂಬಿನಾಯನ ಮುಂಡೊಗು ಮುಂಚಿಕಲ್ಲ್ ಇಜ್ಜೀಂದ್ ಪನ್ಪಾವೆರ್. ಉಂದು ನಮ್ಮ ಮಣ್ಣ್ ದ ನಂಬೊಲಿಗೆ. ಈ ಸತ್ಯದ- ನಂಬೊಲಿಗೆದ ಮೂಲ ಪುರುಷೆ ಬಲಿಯೇಂದ್ರೆ.
ಬಲಿಯೇಂದ್ರನ ನೆನೆಪು ನಂಕೊಂಜಿ ದೈರ- ಬೆರಿಸಾಯ. ಬೆನಲಾತ್ ಬೆನ್ಲ, ಕಿದೆನಿಲ್ಕೆ ಎರುಎರ್ಮೆ, ಪೆತ್ತಕೈಕಂಜಿ ಉಪ್ಪಡ್, ಇಲ್ಲ್ ನಿಲ್ಕೆ ದಿಂಜಿದಿನ ಕುಟುಮ ಉಪ್ಪಡ್, ಅರಿಬಾರಿ ಚೆಲ್ಲಾಡೊಂದು ಉಪ್ಪಡ್. 'ಸಿರಿ' ಉರ್ಕೊಂದುಪ್ಪಡ್ ಉಂದು ಪೂರ ಬಲಿಯೇಂದ್ರೆ ಕೊರ್ಪೆ; ಎಂಚ ಕೊರ್ಪೆ: ಮೂಜಿ ದಿನತ ಬಲಿ ಗೆತೊಂದು "ಪೊಲಿ"ತ ನದ್ ರ್ಡ್ ಕೊರ್ಪೆ. ಅಯಿಕೆ ಪರ್ಬದಾನಿ ತುಡರ್ ತೋಜಾದ್ ನಟ್ಟೊನುವ: "ಮೂಜಿ ದಿನತ ಬಲಿ ಗೆತೊಂದು ಪೊಲಿಕೊರ್ಲ". "ಆ ಊರುದ ಪೊಲಿ ಕೊಂಡತ್ತ್ ದ್ ಈ ಊರ್ದ ಕಲಿ ಕೊಂಡೋಲ ಹರಿಯೋ ಹರ.." ಇಂಚ ಬಗೆಬಗೆಟ್ ಬಿನ್ನಾಯ ಮಲ್ಪುವ.
ತುಡರ್ (ದೀಪ: ತಡ್ಪೆಡ್ ಬಾರ್ ಪಾಡ್ದ್, ಅಯಿಟ್ ತಿಪಿಲೆಡ್ ಅತ್ತಡ ಕಂಚಿದ ದೇಪೊಡು ಎಣ್ಣೆದ ದೀಪ, ಬಚ್ಚಿರೆ ಬಜ್ಜೆಯಿ... ಇಂಚ ವಸ್ತುಲೆನ್ ದೀದ್ ತಯಾರ್ ಮಲ್ಪುವ ತುಡಾರ್) ತೋಜಾವೊಡು, ಪೊಲಿ ಲೆಪ್ಪೊಡು. ಅಂದ್... ಓಡೆಗ್ ತುಡರ್ ತೋಜಾವೊಡು? ಒಯಿಕ್ ತುಡರ್ ತೋಜಾವೊಡು? ದಾಯೆಗ್ ತುಡರ್ ತೋಜಾವೊಡು? ಉಂದು ಇನಿತ ಸವಾಲ್. ಸವಾಲ್ ಅತ್ತ್ ... ಪರ್ಬ ಕರಿಪುನ ಕ್ರಮ ಎಂಚ, ದಾಯೆಗ್ ಇಂಚನೆ ಪರ್ಬ ಕರಿಪೊಡು ಪನ್ಪಿನ ನಡವಳಿಕೆ ಮದತ್ತ, ಬೆನ್ನಿದ ಬದ್ಕ್, ಬೆನ್ನಿನ್ ಮದತೊಂದುಲ್ಲ. ಅಂಚಾದ್ ಪರ್ಬದಾನಿ ಬರ್ಪಿನ ಬಲೀಂದ್ರನ್ ಎದ್ಕೊನುನು ಪನ್ಪಿ ಮೋನೆ ಇಜ್ಜಾಂದೆ ಪೋಂಡು. ಆಂಡಲ ಬೆನ್ನಿನೆ ನಂಬೊಂದು ಬೆನ್ನಿ ಬೆನೊಂದುಲ್ಲ. ಅನಾದಿದ ಕ್ರಮೊಟು ಪರ್ಬ ಕರಿಪುವೆರ್. ಜೋಕುಲೆಗ್ ಉದಾರ್ಮೆ ಕೊರ್ದು ತೋಜಾದ್ ಇಂಚ ತುಡಾರ್ ತೋಜಾವೊಡು ಪಂಡ್ ದ್ ಪನೊಲಿ.
ಬಲೀಂದ್ರೆ ಪಾತಾಲೊಗು ಸಂದಿಯೆ:
ಒಂಜಾನೊಂಜಿ ಕಾಲೊಡು ಅರಸು ಬಲಿಯೇಂದ್ರೆ ಸತ್ಯ ದರ್ಮೊಡು ರಾಜ್ಯ ಆಲ್ಯೊಂದಿತ್ತೆ . ಬೂಮಿಲಾ ಬೂಮಿದ ತಮೆರ್ ಲಾ ನ್ಯಾಯದ ಸಾದಿಡ್ ಇತ್ತೆರ್. ಅಂಚಾದ್ ಸಜ್ಜನೆರ್ ಪೋಡಿಗೆ ಇಜ್ಜಾಂದೆ ಬದುಕುನ ಕಾಲ ಅವ್ವಾದಿತ್ತ್ಂಡ್ .ಲೋಕದ ಸಮಸ್ತೆರ್ ಸುಕೊಟು ಕಾಲಕರಿತೊಂದಿತ್ತೆರ್. ಬಡವುದಾಯೆಗ್ ಬಂಜಿನಿಲ್ಕೆ ನುಪ್ಪು, ಮೈ ನಿಲ್ಕೆ ಕುಂಟು, ಕುಲ್ಯರೆ ಇಲ್ಲ್, ಬದ್ಕರೆ ಬೆನ್ನಿ. ಉಂದು ಅರಸು ಬಲಿಯೇಂದ್ರನ ರಾಜ್ಯದ ಕುಂದುದಾಂತಿನ ಅರಸಾದಿಗೆ್.
ದೇವಲ್ಯೊಡು ಉಚ್ವಯ, ಬೆರ್ಮೆರೆಗ್ ಬೆರ್ಮಮಂಡಲ, ನಾಗಗ್ ತನು ತಂಬಿಲ, ದೈವ- ಬೂತೊಲೆಗ್ ನೇಮ; ಇಂಚ ಒಡಿದಾಂತೆ ದೈವ- ದೇವೆರೆ ಚಾಕರಿ ನಡಪಾವೊಂದು ಬಲಿಯೇಂದ್ರೆ ದರ್ಮ ಸಾಂಗ್ಯೊಂದಿತ್ತೆ.
ಈ ಪೊರ್ತುಡು ಅರಸುಲು ಮಲ್ಪುನ- ಮಲ್ಪೊಡೇ ಆಯಿನ ಒಂಜಿ ನೇಲ್ಯ ಓಮ ಮಲ್ಪರೆ ಅರಸು ತೊಡಗಿಯೆ. ನಿಚ್ಚ ಓಮ, ದಾನ ದರ್ಮ, ಅನ್ನದಾನ, ಬತ್ತಿನಾಯನ್ ಬಜಿಕೈಟ್ ಕಡಪುಡ್ಯರ ಇಜ್ಜಿ.. ಇಂಚ ಒಡ್ಕ ದಾಂತೆ ದರ್ಮೊ ನಡತೊಂದು ಇತ್ತ್ಂಡ್.
ಬೂಮಿಡ್ ಮಲ್ಪುನ ಓಮದ ಪುಗೆ ಮೇಗಿ ಲೋಕ ಮುಟುಂಡು. ಈ ಓಮೊಗು ಸಂತೋಸುಡು ಅಲ್ಪದ ಗುರ್ಕಾರೆ ಕಾಲೊಗು ಸರಿಯಾದ್ ಬರ್ಸಕೊರೊಡು, ಬುಲೆ ಬಾಗ್ಯ ದಿಂಜಾವೊಡು, ಅವು ಆ ಅರಸುನ ಜಬದಾರಿ. ಆಂಡ ಆಯೆ ಕಳು ಎನ್ನಿಯೆ. ತನ್ನ ಮಣೆಕ್ ಕಣ್ಣ್ ದೀದ್ ಬಲಿಯೇಂದ್ರೆ ಓಮ ಮಲ್ತೊಂದುಲ್ಲೆನಾ... ಇಂಚ ಎಣ್ಣೊಂಡೆ, ನಾಲ್ ಕೈತ ನಾರಾಯಣ ದೇವೆರೆಡ ದೂರು ಕೊರಿಯೆ.
ದೇವೆರ್ ಎಂಚಿನ ಎಣ್ಯೆರಾದಾನ್ನ. ದಾನ ದರ್ಮೊದ ಕಜ್ಜೊಡು ತೊಡಗಿನ ಅರಸುಡ ದಾನ ಕೇನ್ ಗಾಂದ್ ಬೆರಣ ಮಾಣಿನ ಒರುಟು ಬಲಿಯೇಂದ್ರನ ಓಮದ ಚಪ್ಪರ ಪೊಗ್ಗುವೆರ್. ಕಪಟ ಎನ್ನಂದಿನ ಅರಸು ಎದ್ಕೊನುವೆ, ಕೈಕಾರ್ ದೆಕ್ಕುವೆ, ಮಣೆಟ್ ಕುಲ್ಲಾದ್ ಕಾರ್ ಗ್ ಪುಡಾಡ್ದ್ "ದಾನೆ ಬತ್ತರ್, ಎನಡ್ದ್ ದಾದ ಆವೊಡು" ಇಂಚ ಕೇನುವೆ."ಎಂಕ್ ಅನ್ನದಾನ, ವಸ್ತ್ರದಾನ, ಕನ್ಯಾದಾನ ಬೊರ್ಚಿ ಮೂಜಿಮುಟ್ಟು ಬೂಮಿ ದಾನ ಕೊರ್ಲಾಂದ್ ಕೇನುವೆ ಬೆರಣ ಮಾಣಿ. ಈ ನಡುಟು ಮಸ್ತ್ ಪಾತೆರ ಕತೆ ಆಪುಂಡು, ಅರಸುನ ಗುರುಕುಲು ನೆಟ್ಟ್ ದಾದಾನ ಕಪಟ ಉಂಡು ಪನ್ಪೆರ್. ಒವ್ವನ್ಲಾ ಕೇನಂದಿ ಅರಸು ದಾನಕೊರ್ರೆ ನೀರ್ದ ಗಿಂಡೆ ದೆರ್ಪುವೆ.
ಗುರುಕುಲು ಗಿಂಡೆಡ್ ನೀರ್ ಜಪ್ಪಂದಿಲೆಕ್ಕ ಗಿಂಡೆದ ಕೊಂಬುದ ಉಲಾಯಿ ಕಪ್ಪೆದ ಒರುಟು ಕುಲ್ಲುವೆರ್. ಬೆರಣಮಾಣಿ ದರ್ಬೆದ ತುಂಡು ಗಿಂಡೆ ಕೊಂಬುಗು ಪಾಡುವೆ. ಗುರುಕುಲೆ ಕಣ್ಣ್ ಪೋಪುಂಡು, ನೀರ್ ಜತ್ತ್ ದ್ ದಾನ ಮಾಣಿಗ್ ಸಂದ್ಂಡ್.
ಮೂಜಿ ಮುಟ್ಟು ಲಪ್ಪರೆ ಸುರು ಆನಗ, ಮಾಣಿ ಆಕಾಸೊದ ಎತ್ತರೊಗು ಬುಲೆದ್ ಒಂಜಿ ಪೆಜ್ಜೆಡ್ ಇಡೀ ಬೂಮಿನ್ ಲಪ್ಪುವೆ, ರಡ್ಡನೆ ಪೆಜ್ಜೆಡ್ ಆಕಾಸೊನು ಲಪ್ಪುವೆ, ಮೂಜಿನೆ ಪೆಜ್ಜೆ ಒಡೆಗ್ ದೀವೊಡು ಪಂಡ್ ದ್ ಕೇನುವೆ. ಅರಸುಗು ಸತ್ಯ ಗೊತ್ತಾಂಡ್, ದೇವೆರೆಗ್ ದಾನ ಕೊರ್ಪಿನ ಮಾಮಲ್ಲ ಪುಣ್ಯಾದಿಗೆ್ ಬತ್ತ್ಂಡ್ ಪನ್ಪಿನ ಐಸ್ರೊಡು ಮೂಜಿನೆ ಪೆಜ್ಜೆ ಎನ್ನ ತರೆಕ್ ದೀಲೆ ಪಂಡ್ ದ್ ಪನ್ಪೆ ಅರಸು ಬಲಿಯೇಂದ್ರೆ. ಬೆರಣ ಮಾಣಿ ಪೆಜ್ಜೆ ದೀದ್ ಅರಸುನಿ ಪಾತಾಳೊಗು ತರ್ಪುವೆ.
ಇಂಚ ಪಾತಾಲೊಗು ಸಂದುನ ಪೊರ್ತುಡು ಅರಸು ಪಣ್ಪೆ ಎನ್ನ ಉಡಲ್ ಡ್ ಬೇನೆ ಬೇಸರ ಇಜ್ಜಿ. ಆಂಡ ಎನ್ನ ಸಿರಿ ಸಂಪೊತ್ತು ದಿಂಜಿದಿತ್ತಿ ರಾಜ್ಯ, ಬುಲೆ ಬಾಗ್ಯದ ಪೊಲಿತ ಪೊಲ್ಸು, ಎನನ್ ದೇವೆರೆಂದೆ ಗ್ರಹಿತಿನ ಜನಮಂದೆ; ಉಂದೆನ್ ಬುಡ್ದು ಪೋವೊಡೆ - ಅಂಚೆನೆ ಪೋವ್. ಆಂಡ ವರ್ಸೊಗು ಒರ ಆಂಡಲ ಎಂಕ್ ಎನ್ನ ರಾಜ್ಯೊಗು ಬರ್ಪಿ ಪುಣ್ಯ ಕೊರ್ಪರಾ... ಪಂಡ್ದ್ ನಟೊನುವೆ. ದೇವೆರ್ ಆವು ಪನ್ಪೆರ್. ಪಾತಾಳೊಗು ಕಡಪುಡುವೆರ್. ತಾನ್ ಪಾತಾಳ ಅರಂತಡೆದ ಬಾಕಿಲ್ ಕಾಪುವೆರ್ ಪನ್ಪಿನ ಕತೆ ಉಂಡು. ಮಸ್ತ್ ವಿಸ್ತಾರವಾಯಿನ ಕತೆ ಉಂಡು, ಎಲ್ಲಿ ಮಲ್ತ್ ದ್ ಪನ್ತಿನಿ.
ಬೊಂತೆಲ್ದ ಅಮಾಸೆ:
ಪಾತಾಲೊಡು ಇಪ್ಪುನ ಅರಸು ಆಟಿಡ್ ತನ್ನ ಆಳ್ ಕಡಪುಡುವೆ ತನ್ನ ರಾಜ್ಯದ ಪೊಲಬು ತೆರಿಯೊನುವೆ, ಸೋಣೊಡು ಅಪ್ಪೆನ್ ಕಡಪುಡ್ದು ಪಿಂದೊನುವೆ. ಬೊಂತೆಲ್ದ ಅಮಾಸೆದಾನಿ ತಾನೆ ಬರ್ಪೆ ಬಲಿಯೇಂದ್ರೆ. ತಾನ್ ರಾಜ್ಯ ಆಲ್ಯೊಂದಿತ್ತಿನ ಕಾಲೊಡು ವರ್ಸ ಇಡೀ, ದಿನ ನಿಚ್ಚ ಇತ್ತಿನ ಗೌಜಿ, ಪರ್ಬದ ಐಸ್ರ ಅಂಚೆನೆ ಇತ್ತೆಲಾ ಉಂಡು ಪಂಡ್ ದ್ ತೋಜಾವರೆ ಈ ತುಡಾರ ಪರ್ಬ ಕರಿಪುವ ನಮ.
ಬೆನ್ನಿ ಬೆಂದಿನ ಕಂಡೊಡು ತುಡಾರ್ ದೀದ್, ಬಲಿಯೇಂದ್ರಗ್ ಕೂ.. ಪಾಡ್ದ್ ಲೆತ್ತ್ ದ್ ಎಂಕುಲು ಇತ್ತೆಲಾ ಬೆನ್ನಿ ಬೆನ್ಪ ಪಂಡ್ ದ್ ತೋಜಾವ.
ಎರು, ಗೋಣೆ, ಪೆತ್ತ ಕೈಕಂಜಿಲೆಗ್ ತಿನಲಾತ ಪರ್ಬದ ಅಡ್ಯೆದೀದ್ ಕಿದೆಕ್ ತುಡಾರ್ ತೋಜಾದ್ ಬಹುಕಾಲ ಬಾಲ್ ಲೆ ಎಂಕಲೆಗ್ ಪೇರನುಪ್ಪು ಕೊರ್ಲೆ ಪಂಡ್ ದ್ ನಟೊನುವ. ಉಂದೇ ನಮ್ಮ ಗೋಪೂಜೆ. ಇತ್ತೆ ಮನದಾನಿಲಾ ಮಲ್ಪುವ.
ಬೆನ್ನಿಗ್ ಗಳಸುನ ನೊಗ ನಾಯೆರ್, ಕೊಟ್ರೆ, ಪಿಕ್ಕಾಸ್ ಗ್ ಲಾ ತುಡಾರ್ ತೋಜಾವು ನೆಟ್ಟ್ ಬೆನ್ನಿಗ್ ಸಕಾಯ ಆಪುನ ಎರು, ಪೆತ್ತಗ್ ಮಾತ್ರ ಅತ್ತ್ ಜೀವದಾಂತಿ ವಸ್ತುಲೆಗ್ ಮಾನಾದಿಗೆ ಸಂದಾವುನ ನಮ್ಮ ಎಡ್ಡಾ್ದಿಗೆ.
ಇಲ್ಲ ಚಾವಡಿಡ್ ರಾಸಿ ಪಾಡ್ದ್ ಅಯಿತ ಮಿತ್ತೊಂಜಿ ತೆಪ್ಪುಇತ್ತಿ ತಾರಾಯಿ ದೀದ್ ಉಪ್ಪುವ,ಒರ ಪೊಲಿ ಲೆತ್ತಿಪ್ಪುವ, ಕೆಲವೆರ್ ತುಪ್ಪೆಲಾ ಪಾಡ್ದ್ ಉಪ್ಪುವೆರ್. ಆ ಬುಲೆ ಬಾಗ್ಯೊಗು ತುಡರ್ ತೋಜಾದ್ ಬೊಕ್ಕೊರ ಪೊಲಿ ನಟ್ಟೊನುವೆ. ಬೆನ್ನಿನ್ ನಂಬುನಾಯಗ್ ಬುಲೆನೆ, ಅಯಿತ ಪಲನೇ, ದಾನ್ಯನೇ ಸಂಪೊತ್ತು, ಅವ್ವೆ ಲಕ್ಷ್ಮಿ. ಅಂಚಾದ್ ನಂಕ್ ಪ್ರತ್ಯೇಕ ಲಕ್ಷ್ಮಿ ಪೂಜೆ ಇಜ್ಜಿ. ಉಂದುವೇ ಧಾನ್ಯಲಕ್ಷ್ಮೀಗ್ ತುಡಾರ್ ತೋಜಾವುನ ಪೂಜೆ.
ತುಲಸಿ ಕಟ್ಟೆಗ್, ದೈವ- ಬೂತದ ಇಲ್ಲಗ್ ತುಡಾರ್ ತೋಜಾವ. ಪರ್ಬದ ಅಡ್ಯೆ ತಿಂದ್ ದ್ ಕುಸಿ ಬುಡ್ಪ. ಉಂದುವೆ ಪರ್ಬ. ಇಲ್ಲ್ ನಿಲ್ಕೆ ಜನ- ಜೋಕುಲು ಬಾಲೆಲು, ಚಾವಡಿಡ್ ಬಾರ್ ದ ರಾಸಿ, ಜಾಲ್ಡ್ ತುಪ್ಪೆ ಉಂದುವೆ "ಪೊಲಿ" ದಿಂಜಿನ ಪೊರ್ತು- ಪರ್ಬ.
ಊರೊರ್ಮೆ ತುಡರ್:
ಇಲ್ಲಡ್ ಪೊತ್ತಾಯಿನ ಒಂಜಿ ತುಡರ್ ಇಲ್ಲ್ ನಿಲ್ಕೆ ಆದ್, ಜಾಲ್ ಡ್ ಬೊಕ್ಕ ಕಂಡೊಲೆಡ್ ಅರ್ಲೊಂದು ಊರು ನಿಲ್ಕೆ ತುಡಾರ್ ಅರ್ಲುನನೆ ತುಡರ ಪರ್ಬ. ದೇವಲ್ಯೊಡು, ಬೂತ- ದೈವ ಸಾನೊಡು ಪರ್ಬೊಡ್ದು ಬೊಕ್ಕ ಒಂಜಿ ತಿಂಗೊಲು ತುಡರಬಲಿ ಅವ್ವೆ ಲಕ್ಷ ದೀಪೋತ್ಸವ.
ಅಮಾಸೆದ ಕತ್ತಲೆಡ್ ಊರೊರ್ಮೆ ತುಡರ್ ಬೆಲಗುಂಡು. ಗೌಜಿದ ಕಾರಣಗು ಜೋಕುಲು ಬೆಡಿ ಬುಡ್ಪೆರ್. ಸುರುಸುರು ಕಡ್ಡಿ ಪೊತ್ತಾವೆರ್, ದುರ್ಸು ರಟ್ಟಾವೆರ್. ಒಟ್ಟುಗು ಕತ್ತಲೆಡ್ ತುಡರ್ ಮಿನ್ಕುನನೆ ಪರ್ಬ. ತುಡರ ಪರ್ಬ.
ಪ್ರತಿ ಇಲ್ಲದ ಕಂಡಿಡ್, ಬಾಕಿಲ್ ಡ್, ಜಗಲಿಡ್, ಪಾಗಾರೊಡು ದೀಪಪೊತ್ತಾವುನ ಕ್ರಮ ಉಂಡು. ತುಡರ ಪರ್ಬ ಇಂಚ ಪೇಂಟೆಡ್ ಲಾ ಉಂಡು. ಪರ್ಬ ನಡತೊಂದು ಬೈದ್ಂಡ್. ಕಾಲ ಬದಲಾತ್ಂಡ್, ಕೂಡುಕುಟುಮ ಐನ್- ಪತ್ತಾದ್ ತುಂಡಾತ್ಂಡ್ ಆಂಡ ವರ್ಸೊಗೊರ ಆಂಡಲ ಮೂಲದ ಇಲ್ಲಡ್ ಒಟ್ಟಾಪಿನ ಕ್ರಮ ಒರಿದ್ಂಡ್.
ಎರು ಗೋಣೆ, ಪೆತ್ತಕೈಂಜಿ ತಾಂಕರೆ ಆವಂದೊಜ್ಜಿ, ಐತ ರಕೋಲೆ ತೂವರೆ ಜನಕುಲು ಇಜ್ಜೆರ್. ಅಂಚಾದ್ ನಮ ಕಂಡೊಲೆಡ್ ಮಿಶನ್ ಬಲಿತ್ತೊಂದುಂಡು, ನಟ್ಟಿಗ್ ಜನ ತಿಕ್ಕುನ ಕಡಮೆ ಆತ್ಂಡ್. ಇತ್ತೆ ಅಲ್ಪಸ್ವಲ್ಪ ತಿಕೊಂದುಂಡು. ಐಕ್ ಇತ್ತೆನೆ ಕಂಡ ಕೋರ್ರೆ ಸುರು ಆತ್ಂಡ್. ಕಂಡೊಲು ಪಡೀಲ್ ಬುರ್ರೆ ಬುಡಯ ಪನ್ಪಿನ ಬೆನ್ನಿದ ಜನೊಕುಲು ಉಲ್ಲೆರ್. ಅಂಚಾದ್ ಪಡೀಲ್ ಕಂಡೊಲು ತೋಜಂದ್, ಬೆನ್ನಿ ಬೆನ್ತಿನ ಕಂಡೊಲೆ ಮಾತ್ರ ಬಲಿಯೇಂದ್ರಗ್ ತೋಜುಂಡು, ಐಕ್ ನಮ ತುಡರ್ ದೀಪ.
ಅಮಾಸೆದ ಕಪ್ಪು ಕತ್ತಲೆದ ಪೊರ್ತುಡು ಬಲಿಯೇಂದ್ರೆ ಬರ್ಪಿನತ್ತ?
-ಕೆ.ಎಲ್. ಕುಂಡಂತಾಯ
إرسال تعليق