ಕವನ: ವರ್ಷಧಾರೆ

 

ಮುಂಗಾರಿನ ಈ ತುಂತುರು ಮಳೆ

ಜುಳು _ಜುಳು ಹರಿಯುವ ನೀರಿನ  ಸಂಗೀತದ ಸೆಳೆ

ಹಚ್ಚ ಹಸುರಾಗಿ ಬೆಳೆದು ನಿಂತಿರುವ ಭತ್ತದ ಕಳೆ

ಕರುನಾಡಿಗೆ ಬಂದಿದೆ ಮುಂಗಾರು ಕಳೆ||

ಕಾರ್ಮುಗಿಲು ಕರಗಿ ಧೋ.... 

ಆಗಮಿಸಿತು ವರ್ಷಧಾರೆಯು

ಜೀವಸಂಕುಲ ಸಂಭ್ರಮದಿ ಬೆರಗಾದವು 

ಮಳೆಹನಿಯ ತಲ್ಲಣಕ್ಕೆ ಮರಗಿಡಗಳು ಚಿಗುರಿದವು

ಈಗ ಎಲ್ಲವೂ ತನ್ಮಯ

ಹಸಿರುಡುಗೆಯಲ್ಲಿ ಮಿಂಚಿ

ಒಡಲು ತುಂಬಿಕೊಂಡ ಧರಣಿ

ರಂಗಿನೋಕುಳಿ ಬರೆದ ಸುಮಗಳ ಮೇಳ||

ಖಾಜಾಣ ಕೋಗಿಲೆಗಳ  ಝೇಂಗಾರ

ಸೌಂದರ್ಯದಿ ಜಗ ಬೆರಗಾಗುವ

ಗರಿಬಿಚ್ಚಿ ನಲಿಯುವ ನವಿಲುಗಳ ನರ್ತನ

ಎಲ್ಲೆಂದರಲ್ಲಿ ಹೊಸತನ , ಚೈತನ್ಯ

ಬಿರುಗಾಳಿಗೆ ನರ್ತಿಸುವ ದಟ್ಟವಾದ ಮರಗಳು

ಧುಮ್ಮಿಕ್ಕಿ ಹರಿಯುವ ನದಿ, ಜಲಪಾತಗಳು||

ಭುವಿತುಂಬ ನಿಟ್ಟುಸಿರ ಮೂಕಮಾಯೆ

ಕಂಗಳು ತಣಿಯುವ ಸಂಭ್ರಮದ ಛಾಯೆ

ಅಮೃತಧಾರೆಯ  ಸ್ಪರ್ಶದಿ ಇಳೆ ಆಗುವುದು  ಧನ್ಯ

ಮುಂಗಾರಿನ ಸೊಬಗು ಕವಿತೆಯಲ್ಲಿ ವರ್ಣಿಸಲಾಗದಷ್ಟು ಅನನ್ಯ....!!||

✍️ ಕು/ಸಂಧ್ಯಾ ಕುಮಾರಿ ಎಸ್, ವಿಟ್ಲ .